Hyderabad Mizo Association thuchhuah

HYDERABAD MIZO ASSOCIATION

(Regn. No. 1837/87 A.P.)

_____________________________________________________

Dated: 9.3.2009

THUCHHUAH

Kum hnih mai liam ta ah khan Hyderabad a Mizo Thalai security guard tur lak ten harsatna namen lo an lo tawk tawh a. Hei hi an hnathawh tur an hriatchian hmasak loh vang leh an beisei ang a nih tak loh avang a ni ber a. Phai lama hnathawh tum midang te pawh kan fimkhur a, buaina kan tawh loh nan tiin Mizoram chanchin thar tarlanna hrang hrangah Hyderabad Mizo Association chuan thuchhuah hial a lo siam tawh a. Hrechiang tawk tawh tur a kan in beisei laiin tun hnai mai khan hetiang boruak bawk hi kan tawng leh ta a ni.

Tunhnai lawkah khan Mizoram atangin Hyderabad-ah Security Guard hnathawk turin Mizo tlangval paruk (6) chu an lo thleng thla a. Aizawl-ah hnathawk tura kawhhmuhtu(consulting agency) te nen an hnathawh tur engkim inbe felin, an hlawh turte pawh chiang taka in hrilhin an rawn thlen thlak hnu a hna chu thawk nghal mai turin Hyderabad an rawn thleng thla a. An hna hmuh chu an thawk ta ngei a, an mahni in thawk tur a an in beisei dan leh an hnathawh tir dan (working nature) chu a lo inmil ta lova. Tin, an hlawh zat tur a an hrilh ang pawh chu an sawi aia tlem a lo ni a. Vairama khawsa ngai lo leh sum leh pai lama harsatna nei te an nih avangin an duty na tur hmunah pawh a dan pangngai angin a hunah an thleng ziah thei ta lova, an hotute nen an inkarah neuh neuh a awm chho tan a. Ni rei pawh an thawk hman meuh lo, an hna atanga ban an nih bakah an awmna atang in an bungrua nen hnawhchhuah an ni ta a ni.

Mizo thalai ram dang a hna la beisei tur ten hetiang harsatna hi kan tawn tawh lohna turin Hyderabad Mizo Association chuan a hnuai kan tarlan te hi hrechiang theuh turin kan in ngen a ni:

1. Mizorama hna pe thei ni a hna zuar thin consulting agency a piang te hi rintlak leh inghahna tlak vek an ni kher lo tih kan hriat a tul. An mahniin information an pek bakah thildang chikna chang kan hriat a, a rem a nih phei chuan an thawhna tur khawpuia Mizo hruaitute biak rawn hmasak a tha.
2. Hna engpawh kan thawk dawn a nih chuan a ruaitu leh hnathawk te inkarah in remsiamna fel tak, (document) ziak ngei a dah a awm tur a ni. Buaina a lo awmin thusawi a in rem mai ai chuan ziak ngei a dah hian tanfung tha a siam thin.
3. Phai ram dinhmun hrechiang hmasa zet lovin, phai lama hna zawn hi a him hauh lova, vai ho khawtlang nunphung mil a awm thei lo tur phei chu rawn kal loh tawp mai tur a ni. Vai ram hnathawh chungchangah hian chi/hnam hnuai hnung leh chi/hnam tha te inkar a zau a, hna hnuaihnung (unskilled labour) thawk te phei chu chi/hnam hnuaihnung an nih tlangpui avangin an dim ngai meuh lo, an hmusit tel bawk thin. Hei hi Mizo hnathawk tur te hian kan hrethiam lo fo thin. I hrechiang ang u.
4. Phai ram hi hna tha ber ber awmna a ni kher lem lo tih kan hriat a tul. Mizoramah pawh taima tan chuan thawh tur a awm teuh tih hriat a tha. Thiamna bik nei lo (unskilled) tan phei chuan pen chhuah loh a him ber.
5. Khawi hmunah pawh hlawhtling tur chuan beih hram hram a ngai a, kan chhel tawk dawn lo a nih chuan pen chhuah loh a him ber. Vai ram hna hrim hrim hi Mizorama kan thawh dan phung nen a inang lo hle a, a hahthlak tih hriat a tha.
6. A bikin Hyderabad-a kan harsatna tawh tam ber chu Security Guard buaina hi a ni a. Security Guard hna hrim hrim hi hna chhia a ni lem lo, amaherawhchu kan thil tawn tawh atanga ngun taka kan ngaihtuahin eizawn nan leh dinchhuahna a tan kan Mizo puite kan duhsak pui lem lo.

“Pathian leh kan ram tan”

(C.DOTHANGA IPS Rtd)                                                    (JOSEPH K. LALMUANPUIA)
      President                                                                                  General Secretary